Petrovtsiy

Петровций Иван

Иван Петровцій
НАШІ СПІВАНКЫ :

СПІВАНКА ЗА ЖИДІВ
Утколи малым ся тямлю,
Й до типир бым ни зличив,
Кілько рас ня жид осійськый
Вчаловав та й обманив.

Но, на мою душу, нигда
Я ни сердився за вто...
Та й жидів в Осойи было
Точно білше гикой сто.

Як мы мирно в час тот жили -
Ннись лише ми сняться сны...
Кром жидів в Осойи были
Лем цигане й русины.

Брешу! - Щи йинна словачка
Жила в нашому силі.
А вкрайинця - ни йинного,
И никого - с мацкалів!

А ймена жиды вті мали,
Но, такі, що най йим фрас:
Струля, Шльома, Рифка, Хайым,
Мошка, Гершко, Лийба Кац...

Вєнно сьме росли с жидами -
Тко ся бавив, тко ся бив...
Но, а я, сопляк руснацькый,
Житку м первый рас любив...

Первый рас - поцюльовав им...
Й - было всьо, що в любви є!..
Нниська Пірошка Беркович
У Амириці жиє.

А мій ліпшый цімбор Шльома
Файно в шахматы играв.
Айбо нигда так ни было
Вбы д ня с дощкы щось ни вкрав.

Бо кить Шльома ни вкраде нич,
Та згоріла бы зимля!..
Вмер, прощін бы, на Йордані,
Кой Израйиль вызволяв.

Знали всьі сьме, ош торгувуть
У силі лише жиды -
Всьо мінявуть, всьым ганглювуть -
Як старый, так молодый.

Памнятаву, Струля каже:
- По жидіськы говорім:
Моді яну, лайфы біну,
Шма исрайиль, цум пурім.

Рифка нянькови казала:
- Юре, много ни робіть -
Динь на тыждинь для спочиву
Й для молитвы удвидіть.

Ни было так, вбы в час трунный
Ткось дакомусь ни помог:
Русин, жид и циган знали -
В нибі є виликый Бог!

Тко до церкви, тко до бужні
У сятый свій динь ходив.
Русин, жид и циган мали
Свій вкримішньый тинитів.

Та єнного ння у бужни
Рабин голосно вповів:
- Для жидів усього світу
Місто стрічі - Тиль-Авив.

Туй якрас словачка вмелла,
Кой жиды йти гет яли...
Циганів взяли в Домбасы...
Русин сам ся впстав в силі...

Сам ся впстав, та нинадовго -
Ис чужинської зимлі
Почали в сило нам гнати
Украйинцьів, мацкалів...

Кажуть: нас ослободили,
И типир на них робім!..
Моді яну, лайфы біну,
Шма исрайиль, цум пурім!

Ай... Та нащо буду лати!..
Кажуть - жид вонячым быв...
А - мацкаль?! А - украйиниць,
Що на палинці ростыв?!..

Кить мыши ниє в коморі,
Там ся кінчила іда.
Кить ниє у силі жида -
Йде в сило страшна біда!

Притулив мойих сусідів
Тиль-Авив, авать Нью-Йорк.
Вни там, ги я туй, бідувуть?!..
Про тото лем знає Бог!

А типир самі, руснаку,
По-жидіськы говорім:
Моді яну, лайфы біну,
Шма исрайиль, цум пурім...

ЗАГОЛОВКЫ | Пишіть! |