Petrovtsiy

Петровций Иван

Иван Петровцій
НАШІ СПІВАНКЫ :

ДИПУТАЦЬКЫЙ ЗАПРОС
Украйинськый парламент в цiлом свiтi
Май малограмотный - тото й дурному ясно.
Айбо и с ними, кить щось звiдать чоловiк,
Бисiдовати мусай файно, красно.

Я своє звiданя оформлю в дипутацькый
Запрос, й зажену йим на сисiю вилику.
Я знаву, ош йим всьым там ни до нас,
Та гонно быти ош й отвiтять чоловiку.

Гий, дипутаты! Чуєте мене?!
Лишайте пытати дiвок, играти в карты,
Лишайте коняк, брендi, самогон,
И докажiть, ош вы на дащо варты.

Я хочу вбы ис мого Путкарпатя
У Западну Йивропу быв вчиненый мiст,
Широкый, довгый - до Парижа, до Мадрiда.
И вбы на нього тко захотiв, най бы лiс.

Коли после тяшкых ночных трудiв
Удинь на сисiйи вы будете утпочивати,
На пличi мы взьмеме гатiжакы,
А тко й на бiцiклях ся годен розогнати -

По тому мостови в Йивропу пiдеме -
Приймай, Йивропо, сигiнят ис Путкарпатя,
Прокартяных, пропитых команiштами
и дымократами люди!..
Французы, ци - ишпанцi! Мы вам - братя!

Мы иппен были дись серек моста,
Кой чуєме - Йивропа на нас гойкать:
-Домi йди, русине! Украйиниць ти брат,
Вать - стрыйчаник... Иди домi, й ни йойкай!

Кить годен ись - буть дома бис братiв.
Бо ты, русине, єсь народ йивропськый.
И можеш жити ты нормално сам.
Попровбайлуй! - буть чоловiком в свiтi скоцькiм!

...Попробужалися на сисiйи паны,
И догадалися, ош и они - парламент:
Попрочитали наш аццись запрос,
Й рiшили, ош ни варта й говорити с нами.

Бо тко мы є?! Мы - простi русины.
А тко они!? Они всi - дипутаты!..
И туй я думаву: а нащо нам тот мiст?!..
А кить нам иншак сиринчу спровбайловати!?..

ЗАГОЛОВКЫ | Пишіть! |