Petrovtsiy

Петровций Иван

Иван Петровцій
ПОСЛЇДНЇ СПUВАНКЫ
РУСИНСЬКА ПОЕЗИЯ :

СПUВАНКА ЗА ЖИТЬОВУ ЛОГІКУ
Я кажу цїмборови свому,
Што страшно ганить житїє:
– Ушытка логіка у тому,
Ош туйкы логікы ниє.

Нигде, ни в чuм и ни для чого –
Страшенный хаос без кuнця:
Йсе гикой ты вже упив много,
А в погарі ниє динця.

Й проблема: пити ци ни пити –
Кой в філософськый лїзе вирьх,
Звучить вже: жити ци ни жити,
И трощить, ги смертелный тирьх.

Хоть думай, брате, хоть ни думай
Ци ты ся вродити хотїв?!..
Така ся думка чинить глумом –
В сись світ случайно сь залитїв.

И мы ся стрітили случайно
Иннись в сuв книзї, в сuм стишку…
Лем лїпше розыйдїмся файно
Через великых тайн ріку.

ЗАГОЛОВКЫ | Пишіть! |