Петровций Иван
Іван Петровцій
НАШІ СПІВАНКЫ
:
СПIВАНКА ЗА БОСОРКАНЬ
Кить ись лiх извечера,
Зрана собi встань.
Ни вставай упiвночи,
Ни кывай босоркань.
Вдинь нашинiтатися
Доста ти ачий.
В босоркань робочый час
Пiзно уночи.
Ут зорi вичiрньої
До ранньої зорi
Голосять двадушникы,
Вывуть упырi.
Босорканi гурбами,
Кой усьi засплять,
Пут гузiцi - вiникы,
Й, ги чорты, литять.
Кой с чортами стрiтяться,
Де ни путь, а - плай,
Висиляться, бiсяться,
Чинять куперай.
Нам бы вто лем никати,
Быти товды там,
Босорканi пытати
На бiду чортам.
Та кой ты у постели
Куплешся у снах,
Лiтать с босорканями
И твоя жона.
Вдинь, ги ты, трудилася,
Звечера лягла.
Айбо точно так, ги ты,
Спати ни могла!
Бо натура дявольська
Потягла ї в блуд -
Ходить, лiтать, мучачи
Чесный, мирный люд.
Кить приснитьтися, ош тяшко
Тягнеш в горы гною вiз,
Вто жона твоя гузицьов
Всiлася тобi на нiс.
Кить ся снить, ош ни говориш,
Ай мычиш, ги в хлiвi скот,
Вто жона твоя гузицьов
Всiлася тобi на рот.
Кить ся снить, ош дащо хочеш,
А ни можеш - вто чорты
Чинять ис твойив жiнчовков,
Що чинити мавбысь ты!..
Бо жона, що вдинь захоче,
Вто учинить уночи.
А ты пробудишся рано
Фаранный, ниприпочив...
Тяшко с постели злiзаєш,
Гикой с псарнi битый вовк,
И свойiв жiнчовцi кажеш:
- Ачий чорт вночи ня товк!..
А жона махне цицьками,
Укукулить бiлый зад,
И вповiсть: - Тото лем чорту,
Кой заспить, присниться ад!..
Ты щи все очима клiпаш,
И сидиш собi, ги пинь,
А жона: - Щось меч у пысок,
Й починай робочый динь!
Ты, ги вiл, йдеш на роботу,
А про вто ни знаєш нич,
Ош жона в тя - босорканя -
Удробила файну нiч...
ЗАГОЛОВКЫ | Пишіть! |
© Іван Петровцій, 1996
