Петровций Иван

Иван Петровцій
НАШІ СПІВАНКЫ :
 

СЛОВО РУСИНА

Было дiло - было слово.
Пиля них быв мiй народ.
З стрiх соломляных, дранковых
Дощ му цяпав право в рот.

Може вто й ни дощ быв - манна,
И ни слово было - рiч:
Кликала Марiя Йвана
Сирцьом усвiтити нiч.

Тот народ ходив ногами,
Думати - копоньов мiх.
И лiгав, ги на пергамент,
Лiтопис у мозок стрiх.

Были хлопы здоровеннi,
Дуже файнi всьi дiвкы.
И дiла йих каждоденнi
Сохранялися вiкы.

Цюльовалися файтово,
Билися, ги гентешi.
И росло косицив слово
Ис русинської душi.

Сохли рiкы и потокы,
Мелли замкы и хыжi.
Бог виликый жив высоко,
Русин у долiнi жив.

Господь Бог у велiй славi
И типир живе в хвалi.
А русинськый рiд жадавуть
Постирати ис зимлi.

Боже наш! Буть нашым Богом,
И ушиткым русинам
На зимли дай жити довго!..
Жити дай ушиткым нам!

ЗАГОЛОВКЫ | Пишіть! |

© Иван Петровцій , 1996

Hosted by uCoz