Петровций Иван

Иван Петровцій
НАШІ СПІВАНКЫ :
 

СПIВАНКА ЗА БИЗРОБОТНОГО

З Мигальом зайшлисьме сночи в виндиглiв.
Первый рас исьме вгатили по малiв.
-По смаку йсе щось такоє,
Гибы с слив. -
Хоть гiркоє, ни гiркоє -
Щи вгатив!

Туй Мигаль убытер уста и вповiв:
-Ипно буде, кить нам вткрыєте гордiв.
Палинчина, богу слава,
Молода -
Б'є огньом и п'єся файно,
Ги вода.

Чiлiнгочуть порцылановi фiнжi.
Щось нам баскорять жiнчовочкы чужi.
Кiлько ласкы, кiлько радости
Й тепла
Ты нам, файна палинчиночко,
Дала!

Запалив им цiгаретлик, и - дымлю.
В головi хоть йинну думку ба ци ймлю?!
-Дома дiти ннись ни iли...
А жона
Ут труда за динь здурiла -
Фаранна...

Но, а я бым радый быти фаранным,
Ай кому продам свої робочi нны?!..
Ай кому продам думкы, вать -
Драбачкы,
Вбым тым копыльцям принiс
Грайцарь гiркый!?..

Я - учитиль, а мiй цiмбор - iнженер.
Дiставалисьме дiпломы в СССР.
Ай типир пiшло такоє -
Най му фрас!
Що ни треба ни дiпломы,
Ани нас!

Бо переже ни Мигаль, ни я ни пив -
Каждый мав собi роботу, и робив.
А иннись такi часы -
Злодiськый рай:
Кить ни знаєш гангльовати -
Умирай!

Я ни хочу умирати, а Мигаль
Пережив свого житя лише ферталь.
Ани гангиль, ани рекет -
Ни для нас.
Кандыдаты в дыпутаты?!-
Най йим фрас!

Де є злодiй май страшный, вать де є блядь
Май мерска, гикой в парламинтi сидять?!

И завто Мигаль ся нниська
Лає фест:
-В рекет пiду, як проп'ю свiй
Интелект!

З Мигальом зайшлисьме сночи в виндиглiв,
А до рана ввiн и я домак вдурiв:
Удобралисьме всьi грошi
В корчмаря,
Я двох лепавых свини
У 'форд' запряг.

Свiнi вывуть, 'форд' скрипить, мы сидиме
Й щи страшнiше, гикой свiнi, лящиме.
Хоть бы ткось дащось битангам
Уповiв:
Люде запеллися по хыжах,
Гикой миртвi.

Спить будитилями ни розбуженый народ.
Нашi свiнi тягнуть амирицькый 'форд'.
Приглушила палинчина
Интелект.
Уперед, руснакы! Лем, куды -
Вперед?!..

ЗАГОЛОВКЫ | Пишіть! |

© Иван Петровцій , 1996

Hosted by uCoz