Петровций Иван

Іван Петровцій
НАШІ СПІВАНКЫ :
 

ОБРАЩИКЫ ИС НIРИДЬГАСЬКОГО П'ЯЦУ

Сонце рано лем встає,
Вашар-п'яц уже жиє:
Тко с автобуса, тко с корчiв
Улiзавуть, мывуть очи,
Роскладавуть свiй товар -
Починаєся базар.
Штримфлi, рекликы, тапловкы,
Фiнжi, мынкавi бiмбовкы,
Лады, лайбикы, лапсары,
Пайтиковi попiсары,
Жиболовкы, виндилькы,
Лопты, ляцi, питилькы,
И усякый иншый фрас -
Всьо вы купите уд нас.
Лем горниць, що в нього сцяти,
Вже ни хочуть куповати,
Бо Василь вночи устав -
Сп'яну повный го наклав.
Ферi вчора так напився,
Що лем рано похмелився.
Сiв у луксоши за кормань -
Спить, що уттыть го ни вдорвеш.
Лем Марiя всьо, що є,
Файно лежа продає:
Продавала вшитку нiч -
Ни бирує удинь нич.
В Нiридьгазi по базару
Ходять шпiцликы, шандаре:
Кого хочуть - поштровфувуть,
Убберуть - ни пошкодувуть.
А пут вичiр по дорозi
Повно нашых мафiозi:
В кого є товар хорошый,
В того просять файнi грошi.
Просять мирно, ни грозять,
А ни даш - й тебе спалять.
Кить убыйдешся бис бiйкы,
Вчиниш и собi копiйку.
И спiшиш в ларькы мадярськi
Куповати гатi царськi.
Мiряш майшликы, пачмагы...
А як запече тя зага,
Прiмкнеш тої палинчины,
Й видиш аттаку картину:
Митер мiрять на Поланю
Будюговы ис Тайваню.
Змийригована Юланка
Тяшко мiряє топанкы:
П'яты тиснуть, персты рiжуть,
А на ногы все ни лiзуть,
Бо Юланка файна была -
Мiсяць ногы вже ни мыла.
Анця так нацицник мiрять,
Що всьый п'яц на ню позирать.
А Петро натях клебан,
И такый у нiм, ги пан.
Як узнав, ош клебан с Хуста,
Нарас долi рукы пустив.
Лише хытрi мужi й жоны
Гангиль й туй чинити гонны:
Тягнуть сiткы с светерами,
Гатiжакы с годинками -
На Вкрайину повезуть,
И выгодно продадуть.
Юра пытаться в жебы -
Ай там заробок слабый:
Мало вбы дащо купити,
Иппен тiлко вбы пропити.
Що дешево даєме,
Дуже лехко проп'єме...
Витко вто є божа кара -
Тратиме час за гатаром,
А за чисть, авать за совiсть
Вже нитко нич и ни вповiсть.

Дома зимля ни орана,
Хыжа, стайня ни впорана...
Тым, тко нас привiх до сього
Запустенiя страшного,
Кажу: - Мы вту заграницю
Щи вам заб'єме в гузицю!

ЗАГОЛОВКЫ | Пишіть! |

© Іван Петровцій, 1996

Hosted by uCoz