Петровций Иван

Иван Петровцій
НАШІ и НИНАШІ СПUВАНКЫ
РУСИНСЬКА ПОЕЗИЯ :
 

Шарль БОДЛЕР
(1821-1867 рр., Франция)


СПUВАНКА ЗА ЗДЫХЛЯТИНУ


Ци тямите тото, што відїли сьме, душко,
             В час лїтный пиля пішака?
Здыхлу кобылуб што ї ублїпили мушкы,
             Того мерзкого воняка.

Ги дешева жона, она розвелла лабы,
             А уттuть жовтоэ текло,
Штось, гикой сукырвиця, й бульбилося слабо,
             Што давно чивдырuв тягло.

Тоту гнилятину щи й сонце припікало,
             И труп ся вд спекы розпадав,
Гибы дарабами Природї ся вертало,
             Што Бог єдностанно создав.

До неба ся тягли тонкі кuсткы скелета –
             Тuйтакый гикой косичкы.
Уд смрада чорного вы, панїка-естетка,
             Строщили нuс в обі рукы.

Над черевом розорваным зузнїли мухы,
             А зунну того гиндюха
Плелися червакы, и каждый быв розбухлый
             Й лїнивый, гибы там здыхав.

Вто всьо ся кывало, куріцмало, вурдило,
             Цїдило паворозь масну,
Гикой кириня, ся онажило, мастило,
             Вонячо дыхало зунну.

Той світ гнилятины давав музичні звукы,
             Дух ядухливый розвівав,
Гибы сївач, пхав у гиндюх осклизлый рукы,
             И чемерицю розсївав.

У брянжи айирнuв без жадніх форм и ліній,
             У гнидавому бабаку
Лем истинный поет увидить лик богинї
             И намалює вто в стишку.

Из-за корча на нас, худа, уся в коростї,
             Косила сука, гы злый враг –
Лем пuдеме мы гет, она удкусить з костив
             Здыхлятины товстый дараб.

Вы, душко, иппен гикой аттота кобыла,
             Исток заразы и вонї,
Вы, янголе, цвіточку, ляжете в могилу,
             И гнити будете в трунї.

Там личко звацваться, сплыве, ги тиркилина,
             Там персты втпадуть уд рукы,
Там вас, запрятану онь пуд два мийтры глины,
             Йзїдять ушытку червакы.

Красавице, товды вповіште паразитам,
             Аттім трупозным червакам,
Ош в памняти навхтема буду сокотити
             Красу, што Господь Бог дав вам!


Rambler's Top100

ЗАГОЛОВКЫ | Пишіть! |

© Иван Петровцій , 1999

Hosted by uCoz