Петровций Иван
Иван Петровцій
ПОСЛЇДНЇ СПUВАНКЫ
РУСИНСЬКА ПОЕЗИЯ
:
СПUВАНКА ЗА ПUЗНЬОЄ ВЕРТАНЯ
Политїли, ги солома,
Молоді мої рокы.
Я вертавуся до дома,
Де сьме были дїтвакы,
Де сьме были пиля мамы,
Пиля няньовой рукы,
Де сьме босыма ногами
убыйшли всї пішакы.
Там, де сплять старі дерева,
Што м йих скіпцями щи знав,
Сїв над арсагом, и - реву,
Ги м николи ни ревав.
Сонце в небі вто, што й было -
Сила з нього ллє жива...
Иппен мамина могила
В тинитові ни нова.
Косичкы на нuв шовкові
Тарuльцями догоры...
На сільському тинитові
Вшыткы мої цїмборы.
Дале йду свойыв дорогов
Онь до няньовых ворот.
У селї народу много -
Лем вто всьо новый народ.
Низнакомым ся кланяву,
А до серця ймився страх:
Бuлш знакомых дниська маву
В тинитові, ги в хыжах.
Грядку мамчину вже видко -
Де сьте, мамочко моя! -
Туй менї родноє вшытко,
Лем уже ни рuдный я
Людьом нынїшньої днины,
До котрых веде мuй рuд...
Я домu вертався сыном,
А вернув им - сивый дїд.
Кровльов сонця возuр вмыто -
Туй на мойuв старинї
И тепло менї, и сыто,
Й дуже сиротно менї.
ЗАГОЛОВКЫ | Пишіть! |
© Иван Петровцій
, 1996